طريقة احتساب الأيام الفائتة من شهور رمضان سابقة

أنا فطرت في رمضان قبل كده؛ بس مش فاكر كام يوم، ومش فاكر صمتهم ولا لا؛ فأعمل إيه؟

الاحتياط واجب؛ إذن أوّل شيء: نقدّر الأيام، نحن لا نعرفها على جهة اليقين؛ فنقدّرها نحاول نجتهد ونقدّرها، ونقول كأنني أفطرت كذا وكذا في سنة كذا يومين ثلاثة أكثر أقل، ونحصرها، ثم نبدأ في صيام الاثنين والخميس بعد رمضان؛ فنجد أنفسنا إن إحنا صُمنا شيئاً كثير بنيّة قضاء ما عليّ، إحنا عندنا في السنة 52 أسبوعا؛ الإثنين والخميس من كل أسبوع -اللي كان بيصومهم رسول الله صلى الله عليه وسلم كنافلة كسنة- نضرب 2 × 52 يطلعوا 100 يوم في السنة؛ يعني لو استمريت على هذا في السنة تبقى كأنك صمت نحو ثلاثة شهور؛ فإذن افعل هذا ابتداء من بعد رمضان؛ أولاً قدّر، ثانياً صوم الإثنين والخميس بنيّة القضاء؛ فتنتهي من هذه المشكلة.

سؤال آخر يقول:

أنا عندي 70 يوم صيام من شهور رمضان اللي فاتت، تراكم عليها أو عليه 70 يوماً؛ لأني ما كنتش باعوّضهم؛ بس لما كبرت عرفت إنه حرام؛ فسمعت إني ممكن أطلّع فلوس بمقدار الأيام، هل كده صحيح؟ ولو صح.. عايزة أعرف إزاي؟ لو غلط أعمل إيه؟

إذن، نعم ينبغي عليكِ إما أن تُكَفّري وإما أن تخرجي كفّارة، إما أن تعيدي الصيام أو أما تقدّمي كفارة.. الكفارة خمسة جنيه في اليوم؛ يعني 5 × 70 بـ350.. إن كنتِ قادرة على الصيام صومي الإثنين والخميس برضه زي ما قلنا بنيّة القضاء، وبذلك هتلاقي روحك صُمتِ في خلال سنة واحدة كل اللي عليكِ من الأيام.. إذا كُنتِ ما زالت تأتيكِ الحيضة؛ فيبقى إنتِ في بعض الإثنين وبعض الخميس هتلاقيكِ فاتوا منك، معلش؛ لكن إحنا عندنا الإثنين والخميس زي ما قلنا 52 يوم، نشيل منهم رمضان، يبقى أربع أسابيع، يبقى 48 × 2 بـ96 يوم، وإحنا علينا 70 بس، الـ96 × 26 ممكن يضيعوا في مسألة الحيض، والباقي يبقى سنة واحدة تكفي لمثل هذه الحالة.

إذن علينا أن نقضي.. لا تستطيعين؟ الصيام شاقّ عليكِ؟ يبقى نُخرج عن كل يوم من الـ70 خمسة جنيهات.. خمسة جنيهات دي عبارة -كما ذكرنا من قبل في حلقة سابقة- صاع من الطعام، الصاع بيُقدّر بـ2 كيلو ونص تقريباً، والـ2 كيلو ونص من الحبوب اللي هي القمح اللي هي قوت البلد اللي بيُصنع منه الخبز عندنا في مصر، يبقى إذن 2 × 2 ونص ببخمسة جنيه، من هنا جاءت كلمة خمسة جنيهات.

إلى لقاء آخر أستودعكم الله..
والسلام عليكم ورحمة الله وبركاته